今朝又去做產檢,
醫生話我冇乜點重,
可能因為我之前著波鞋磅,
今日著平底鞋卦?!
不過最重要都係小寶有增磅,
今日estimate佢有4磅13安士重,
進度ok。
今日睇唔清小寶個樣呀,
醫生又指小寶D頭髮俾我睇,
不過我諗係佢至知果D係頭髮law......
做完產檢就去左吉之島逛逛,
當然又買左野俾小寶啦!
之後又去左永安買嬰兒浴巾,
再去埋Apita買尿片,
滿載而歸呀!
P.S.多謝小寶個婆婆陪左我大半日呀!
2007年12月29日星期六
34週喇! by 胡師奶
2007年12月25日星期二
聖誕快樂! by 胡師奶
小寶,
Merrry Christmas ^o^
今日收到你公公份大禮,
你開唔開心呀?
個個親戚朋友都咁錫你,
你一定要乖呀,知道嘛?!
公公、婆婆同盈EE好快就搬屋喇,
等你出左世,
daddy、媽咪就帶你去同盈EE玩Wii,
盈EE間房仲有好多玩具玩,
包你鍾意呀!
不過你唔好整爛盈EE D野喎,
盈EE會嬲架!
仲有個半月左右你就出世喇,
大家一齊努力呀!
Love,
媽咪
2007年12月22日星期六
執野、執野、再執野 by 胡師奶
仲有七七四十九日就到預產期,
已經好努力咁買野、執野,
但係好似永遠都未ready,
真係有D擔心到時會一片混亂呀!
繼上個星期捐左兩大袋毛公仔之後,
今日又的起心肝清左一櫃桶既CD,
雖然D毛公仔同CD都keep左好耐,
但係我實在頂唔順全屋都係野喇,
為左放置小寶D野,唯有犧牲一下啦!
下個mission就係要大寶daddy執埋細房吊櫃D舊小說,
然後捐去club house個閱讀室,
希望Christmas holiday可以搞掂啦,
大寶daddy,睇你喇!
2007年12月20日星期四
有野玩 by 胡師奶
2007年12月15日星期六
白蓮鬚 by 胡師奶
八個月喇~~ by 胡師奶
今朝又去做產檢,
照ultrasound時小寶竟然係眠眠中,
第一次咋!
不過佢尋晚開P開左成晚,
都應該要抖抖。
醫生話小寶家陣大約四磅重,
非常標準,
咁我又安心D。
做完產檢同大寶去左婦產科望望D病房,
婦產科好新好大,
感覺都好舒服。
離開醫院時竟然見到Leon個助手子泉&樂基兒,
如果我去叫子泉,
唔知佢認唔認得我呢?哈哈!
之後我同大寶去左護協買野,
今次買左個電動奶泵,
便攜式換片墊同埋一D濕碎野,
收穫豐富呀!
<<懷孕八個月的胡師奶>>
2007年12月13日星期四
2007年12月9日星期日
小寶的私人座駕 by 胡師奶
小寶,
今日daddy同媽咪去Chicco幫你訂左架"私家車"喇,
雖然架車比較大同埋重,
但係學你舅父&LuLu契媽話齋,
最緊要穩陣、安全嘛!
而且單手都可以開車同收車,
所以我諗我都搞得掂既。
你大個女記得要多謝舅父呀,
因為舅父話入佢數喎,
所以媽咪會去追數架喇,哈哈!
Love,
媽咪
<<小寶的私人座駕... 好似係呢款...>>
2007年12月8日星期六
31週 by 胡師奶
今日去左沙田科學園,
參加HealthBaby提供既免費講座,
Topic係"臍帶血處理及應用講座+實驗室參觀"。
因為大寶daddy又要返學,
所以盈EE陪我去,
thank you盈EE!
其實尋晚大寶daddy已經決定揀呢間,
所以聽完講座,參觀完實驗室,
我都即刻搵sales報名。
不過因為得太少sales,
所以都攪左好耐呀!
簽完約就有個盒俾我,
到時要帶埋去醫院俾醫生收集臍帶血喎,
我個走佬篋又多一樣野喇!
今日另一收穫,
就係響沙田買左Aqueous Cream BP,
其實好多藥房都有呢隻cream賣,
不過我想買Adams Healthcare呢隻牌子,
所以搵左好耐呀!
好多人recommend用Aqueous Cream BP黎幫BB沖涼同搽身,
話對皮膚好喎,
幾十蚊有500 gram,
試下都好!
<<懷孕31週的胡師奶>>
2007年12月7日星期五
2007年12月2日星期日
2007年12月1日星期六
第30週 by 胡師奶
今朝去做產檢,
因為大寶daddy要返學,
所以得我一個人去咋!
醫生一照ultrasoud就話小寶已經轉左頭,
好開心呀!
睇完醫生我即刻send SMS通知大寶daddy,
哈哈!
不過據聞有D bb會轉完又轉架!
喂,小寶,你唔好再轉呀!
之後我去左Jusco買野,
因為大減價,所以人山人海呀!
我買左幾件長袍、手套、腳套、帽仔&背心睡袋,
8折再8折,好抵呀!
不過我諗我應該唔駛再買初生衫仔俾小寶喇!
希望聽日趁大寶daddy返學,
我可以的起心肝幫小寶抹乾淨個櫃&洗乾淨部份衫仔啦!
2007年11月29日星期四
小寶的第一件玩具 by 胡師奶
2007年11月27日星期二
羊毛底衫 by 胡師奶
2007年11月25日星期日
疫苗注射 by 胡師奶
尋日大寶daddy要返學,
所以得我自己去上嬰兒護理課程。
上堂前去護協買左D"走佬袋"用品,
又買左奶樽,
財散人安樂,哈哈!
尋日課程主題係"初生嬰兒藥物及疫苗注射",
初時以為會好悶,
但意外地竟然好interesting,
覺得獲益匪淺!
其實,我同大寶daddy之前都決定左將來除左帶小寶去健康院打針之外,
仲要同佢去私家診所/醫院打其他針,
上完呢一堂,
更加覺得有需要咁做...
雖然有D病既個案好少,
但係萬一中招就好大鑊,
都係買個安心好D!
為左小寶健康同將來,
睇黎我同大寶daddy都要努力儲錢喇!
2007年11月22日星期四
小寶,你好! by 胡師奶
2007年11月21日星期三
我的懷孕三寶 by 胡師奶
第一寶,就係呢本書...
關於pregnancy既書,我只係買左呢本咋,
因為呢本書已經有晒我要既資料,
例如懷孕期間每個月既變化, do & don't,
仲有一D懷孕既myths,
解釋得非常詳細,
解開我好多疑團,
真係幫左我好多好多呀!
第二寶,就係呢個側軟枕,
其實唔係買左好耐,
但係家陣冇左佢托住我個big tummy,
我真係唔駛眠!
Last but not least,
第三寶,
就係我個胡大寶!
多得佢分擔我D家務、壓力,
幫我抒緩懷孕期間不安既情緒,
仲有幫我massage,
任勞任怨,
真係好感激佢呀!
其實我除左呢三寶,
仲有好多好多好多寶,
好似媽媽燕窩,奶奶靚湯,
仲有親朋戚友D懷孕tips及種種關懷,
令我呢個烏sir sir既新任媽咪昂然踏入Third Trimester,
希望未來呢兩個幾月都順順利利啦!
2007年11月18日星期日
BB車 by 胡師奶
充實的一天 by 胡師奶
尋日朝早又去左做產檢,
一如以往,又係好緊張!
做ultrasound時,
小寶突然踢左醫生兩下,
唔通佢想同醫生say hi ?
小寶28週大,
大約重兩磅九安士,
醫生話標準喎,
又放下今心頭大石!
做完產檢,
去左太子食野,
然後去新世紀廣場睇BB野,
不過冇收穫。
繼續向佐敦進發,
去護協睇下走佬袋D野,
不過唔知要買幾多,
最後都係兩手空空。
去完護協就去上堂,
可能因為早起身又行得多,
我同大寶daddy都有聽聽下zzzzzzz,
哈哈哈哈哈哈哈哈!
四點落堂,
我同大寶daddy就入大埔同舊同事BBQ,
玩到十一點至返到屋企!
自從有左小寶之後,
好似係第一次踩到咁盡,
雖然好疲倦,但係好開心,
尋晚亦非常好訓,
簡直係昏迷呀,哈哈!
2007年11月13日星期二
Playpen by 胡師奶
今日lunch break走左去中環,
搵埋大寶daddy一齊去買playpen俾小寶,
張playpen係大寶daddy親自揀架!
我地俾完錢,
小寶就好大力咁踢左我幾腳,
我諗佢梗係知道daddy買野俾佢,
開心到跳舞喇!
2007年11月11日星期日
Last Week of Second Trimester by 胡師奶
過埋今個星期就進入Third Trimester,
好緊張呀!
呢排幫小寶揀緊床仔同BB車,
又搵緊人介紹姐姐湊小寶,
仲有睇緊儲存臍帶血D資料,
好忙呀!
2007年11月4日星期日
2007年11月3日星期六
好開心^o^ by 胡師奶
2007年10月28日星期日
2007年10月25日星期四
1磅8安士的小寶 by 胡師奶
早兩日去睇感冒,順便做埋產檢,
小寶24週零3日,
重1磅8安士...
咁... 即係點呀?
醫生話正常喎!
照utlrasound見到小寶隻腳板同腳趾仔,
好得意!
小寶仲放隻手仔響頭後面,
好似人地晒太陽咁,
好歎呀!
2007年10月21日星期日
打敗仗 :( by 胡師奶
小寶,
媽咪又病喇!
本來只係早晚有D咳,
點知前日開始鼻塞、喉嚨痛,
今朝仲有少少傷風添,
真係大鑊......
希望冇影響你啦!
媽咪發覺好多時daddy同你傾完偈你都會郁得好勁,
你係咪聽到daddy講野呀?
媽咪又覺得你會feel到daddy隻手,
係咪架?哈哈!!
小寶呀,
你要健健康康,
唔好好似媽咪咁潺呀!
Love,
媽咪
2007年10月19日星期五
23週6日喇! by 胡師奶
可能因為天氣轉涼,
呢幾日夜晚同朝早都咳,
加上唔多慣側睡,
所以近日訓得麻痳。
小寶呢幾日都郁得好勁,
有時搞到我個肚皮彈下彈下,
好搞笑!
好多時當大寶daddy放隻手響我個肚時,
小寶會郁得特別勁,
好似知道daddy搵佢咁,
好神奇呀!
家陣個肚皮開始出D紅色粒粒,
好彩唔多又唔痕咋!
不過D皮膚真係差左,
又冇得做facial,
真係慘慘慘!
仲有水腫呀,
幾時至腫完呢?!
2007年10月13日星期六
嬰兒哺飼 by 胡師奶
今朝又去上堂,
課題係"嬰兒哺飼",
主要都係講餵母乳D好處&方法,
仲有教點斷奶,消毒餵食用具等等,
非常有用。
其實早已想餵母乳,
加上連小寶個公公都落order話對小寶好,
所以都希望可以得。
不過放完產假就唔知點算,
始終好唔方便,
亦需要好有恆心,
真係要諗一個周全既方法至得喇!
2007年10月6日星期六
22週... by 胡師奶
順利進入22週,yeah ^o^
小寶,繼續努力!!
過去呢個星期:
- 覺得個肚又大左,行路比以前慢&"論盡",哈哈!
- 開始要側睡,如果唔係腰骨會痛。
- 精神ok,不過weekend下晝會好疲倦,要眠眠。
- 呢期好鍾意食橙,其他都冇乜改變,胃口ok。
- 如果feel唔到小寶游水or踢我,我會好擔心!所以批准小寶日日開P...
- 大寶daddy繼續講"龜兔賽跑"...
- 老細Tim叫我小寶一歲時就要教佢用Excel,然後幫手做野... :P
2007年9月29日星期六
忙碌的星期六 by 胡師奶
2007年9月22日星期六
20 weeks ^o^ by 胡師奶
今日胡師奶懷孕20週喇,
剛剛走到旅程既一半,
除左變左做肥師奶之外,
一切都好好!
今個禮拜小寶好乖,
尋晚連大寶daddy都feel到小寶郁,
好開心呀!
宜家我每日都盡量抽D時間播音樂俾小寶聽,
仲加插左大寶daddy既講故事時間,
不過大寶daddy只識講龜兔賽跑,
仲要係縮短版,
我諗我要去library借D故事書喇!
早幾日我又幫小寶開左e-mail account,
哈哈,呢個媽咪真無聊呀!
最後,我同大寶都好多謝陳大師幫小寶諗左好多名,
又借書俾我地睇,
雖然好複雜,我唔係好明,
但我地會努力幫小寶改個好名呀!
Thank you陳大師!
2007年9月16日星期日
Gift from 小盈姨 by 胡師奶
2007年9月15日星期六
19週^o^ by 胡師奶
今日搭金鐘地鐵返屋企時,
本來冇位坐,
點知突然有個四眼哥哥讓坐俾我,
好開心,好感動呀!
尋晚臨訓時feel到肚裡面有野郁下郁下,
都郁得幾強烈,
唔知係咪小寶呢?
家陣得閒都會播D音樂俾小寶聽,
又會叫大寶daddy同小寶傾偈,
不過大寶daddy好懶,
晚晚講同一樣野,
激死我呀!
不過可能我又變態左D,
因為我連冇廁所水都要大寶daddy話俾小寶知,
哈哈哈哈哈!
開始為將間書房變做睡房而頭痕,
實在係mission impossible喇,
不過都要諗,
小寶你幫手諗諗啦!!
2007年9月5日星期三
To 小寶 by 胡師奶
Dear 小寶,
你好嘛?響度做緊乜呢?呢幾日媽咪間中都覺得肚仔裡面有D野郁,係咪你呀?不過人地話冇咁早feel到,可能係媽咪搞錯左,哈哈!
媽咪星期一去左醫院留位交按金喇,比deadline早左7個星期呀!你知唔知呀,你婆婆同阿姨都好緊張,成日叫我快D俾按金呀,所以我都早D搞掂,費事真係冇位就煩喇!
仲有好消息要話你知呀,就係你有兩個契媽呀!一個係LuLu契媽,另一個係小莉莉契媽。除此之外,FunFun姨姨又應承做你個代母,媽咪真係好開心呀,因為呢三位姨姨都係媽咪既好朋友,好姊妹呀!
遲D等你出左世,媽咪介紹個哥哥俾你識啦,佢爸爸話要幫佢個仔報名做你個男朋友仔喎,哈哈,係咪好搞笑呢?
媽咪已經開始幫你諗名喇,不過你daddy成日話唔駛咁早喎。其實英文名都諗好,但要等你daddy批准law,我諗你daddy要等你出左世至決定喇!
媽咪要睇電視喇,你要乖乖地呀!媽咪錫晒你!
Love,
媽咪
2007年9月2日星期日
小寶性別之謎 by 胡師奶
2007年8月25日星期六
十六週 by 胡師奶
十六週喇!
肥左,肚腩大大,真係有D大肚婆feel!
今日搭地鐵,我冇位坐,
有個女仔坐響度玩NDS,
佢望下我個肚,望下我,然後垂低頭繼續玩,
隔幾秒又重覆望下,但望完又繼續玩,
其實唔知佢做乜,
可能佢諗緊我係肥定係大肚啦!
(答案係又肥又大肚......)
收到護協封信,
我地9月底會去上"孕婦產前產後護理課程",
好期待呀!!!
趁我仲記得,
要多謝JJ嫂送咁多衫俾我,
真係慳返唔少!
仲有多謝小妹個friend,
我唔識佢,不過佢過左好多料俾我,
又有野益我,thank you!
2007年8月5日星期日
忙碌的一天 by 胡師奶
尋日過左一個忙碌又充實既星期六。
一早就去做產檢,
今次唔駛等好耐就到我,實在太好喇!
大寶多口問醫生知係男定女未,
醫生話咁細未必睇到,
但佢都好努力去尋找答案。
可惜小寶故意賣關子,
舉起兩隻腳仔遮住重要部位,
哈哈哈哈哈哈哈哈!
做完產檢就去食野,跟住就去配眼鏡,
配完就去BB展。
BB展好多人,用左45分鐘排隊買飛,
不過好彩入到會展至排隊,
有冷氣都冇乜所謂。
因為可以入好多BB會/媽咪會,
而我地又冇print定label,
所以我就不定罰抄自己個名、地址、電話、email & 預產期,
D字潦到不得了,
真懷疑佢地知唔知我寫乜。
因為距離小寶出世實在太遙遠,
所以都係睇野&換試用裝,
不過見D人都買幾多野,
可能真係比較平啦!
行完BB展已經4點幾,
食個tea就同媽咪去買衫,
好彩今年多鬆身衫咋,
可以唔駛買大肚衫住。
就係咁,搞到天黑至返屋企,
出奇地又唔覺太辛苦,
真好!
2007年7月30日星期一
安樂晒 by 胡師奶
今日下晝去威爾斯做OSCAR,即係早孕期一站式唐氏綜合症篩查,好緊張。
三點鐘去到,唔算太多人,等左一陣就抽血喇。
抽完血等做超聲波度頸皮,一等等左成個鐘,
好彩有靚媽陪住咋!
小寶比上星期大左小小,
醫生show佢隻手仔腳仔俾我地睇,
仲俾我地聽左心跳聲添。
等左一陣就有result,超緊張呀!
個護士響度講解,
但我對眼只係望住檯面上份report,睇緊小寶患唐氏綜合症個比率...
好彩,護士話係低風險!
雖然唔係100%準確,不過都安樂晒lu。
2007年7月28日星期六
三個月喇 by 胡師奶
今日小寶三個月大喇,
好開心呀!
個肚又巨左,好多褲都窄喇,
好彩有爸爸,
即刻叫佢響廠度拎褲俾我,
哈哈,又慳番筆!
星期一下晝要做OSCAR test,
小寶你咪嚇媽媽呀,
你媽媽驚青,唔嚇得架!!
2007年7月21日星期六
活躍的小寶 by 胡師奶
2007年7月15日星期日
2007年7月12日星期四
2007年7月4日星期三
9週了! by 胡師奶
終於到第9週喇!
唔知點解,人地大肚好快就生得,
但自己就好似慢吞吞咁...
呢排好易倦,又成日有D反胃,
不過都仲頂得順。
尋日發現teammate又係大肚,
不過佢已經20週喇!
希望大家個bb都健健康康啦 ^o^