忙碌的星期六 by 胡師奶

今日上第二堂"孕婦產前產後護理課程"，
主題係"作產認知與準備"，
哈哈，好似好遙遠，
不過聽完都有D擔心，
我咁騰雞，
到時必定一片混亂！

落堂後去報埋另一個"嬰兒及幼兒護理課程"，
11月初開班，
可惜大寶有幾堂會因為返學而上唔到，
到時只有靠自己喇！

同大寶、媽咪飲完茶，
去左永安睇奶樽，
之後就搭車去做產檢。

醫生話上次驗血一切正常，
跟住照超聲波又見到小寶郁來郁去，
醫生話小寶冇問題，
佢仲俾小寶個樣俾我地睇，
不過我只係隱約見到佢對眼、鼻同嘴仔咋！

醫生話小寶大約一磅重，
keep住呢個進度就ok！
聽完我都鬆晒，
因為我真係好擔心小寶吸收唔到我D營養呀！

一個月後再覆診，希望到時小寶keep住咁健康啦！

20 weeks ^o^ by 胡師奶

今日胡師奶懷孕20週喇，
剛剛走到旅程既一半，
除左變左做肥師奶之外，
一切都好好！

今個禮拜小寶好乖，
尋晚連大寶daddy都feel到小寶郁，
好開心呀！
宜家我每日都盡量抽D時間播音樂俾小寶聽，
仲加插左大寶daddy既講故事時間，
不過大寶daddy只識講龜兔賽跑，
仲要係縮短版，
我諗我要去library借D故事書喇！

早幾日我又幫小寶開左e-mail account，
哈哈，呢個媽咪真無聊呀！

最後，我同大寶都好多謝陳大師幫小寶諗左好多名，
又借書俾我地睇，
雖然好複雜，我唔係好明，
但我地會努力幫小寶改個好名呀！
Thank you陳大師!

Gift from 小盈姨 by 胡師奶

今日一見到阿哥，佢就俾左份禮物俾我，
原來係小盈托阿哥個friend響日本買既禮物，
係送俾大寶daddy架，
等佢做個型daddy喎！

小盈就係送呢個袋俾大寶，但係有乜咁特別呢？

哈哈，原來個袋係可以變身俾小寶坐架，
仲有個人肉肚腩cushion俾小寶攬住，
好過癮呀！

阿哥個friend話要訂貨至有，
真係麻煩晒佢喇！
當然仲要thank you阿哥做中間人，
同埋送禮既小盈啦！

好期待大寶小寶以咁既姿態出現，
哈哈哈哈哈哈哈哈~~

小寶開P? by 胡師奶

尋晚覺得小寶郁得好勁，
搞到個肚有D痛，
輾轉難眠呀！

小寶，你搞乜咁夜都唔眠眠呢？
係唔係開party呀？
不過你唔好晚晚開呀，
媽咪冇精神返工架！

19週^o^ by 胡師奶

今日搭金鐘地鐵返屋企時，
本來冇位坐，
點知突然有個四眼哥哥讓坐俾我，
好開心，好感動呀！

尋晚臨訓時feel到肚裡面有野郁下郁下，
都郁得幾強烈，
唔知係咪小寶呢？

家陣得閒都會播D音樂俾小寶聽，
又會叫大寶daddy同小寶傾偈，
不過大寶daddy好懶，
晚晚講同一樣野，
激死我呀！

不過可能我又變態左D，
因為我連冇廁所水都要大寶daddy話俾小寶知，
哈哈哈哈哈！

開始為將間書房變做睡房而頭痕，
實在係mission impossible喇，
不過都要諗，
小寶你幫手諗諗啦！！

To 小寶 by 胡師奶

Dear 小寶，

你好嘛？響度做緊乜呢？呢幾日媽咪間中都覺得肚仔裡面有D野郁，係咪你呀？不過人地話冇咁早feel到，可能係媽咪搞錯左，哈哈！

媽咪星期一去左醫院留位交按金喇，比deadline早左7個星期呀！你知唔知呀，你婆婆同阿姨都好緊張，成日叫我快D俾按金呀，所以我都早D搞掂，費事真係冇位就煩喇！

仲有好消息要話你知呀，就係你有兩個契媽呀！一個係LuLu契媽，另一個係小莉莉契媽。除此之外，FunFun姨姨又應承做你個代母，媽咪真係好開心呀，因為呢三位姨姨都係媽咪既好朋友，好姊妹呀！

遲D等你出左世，媽咪介紹個哥哥俾你識啦，佢爸爸話要幫佢個仔報名做你個男朋友仔喎，哈哈，係咪好搞笑呢？

媽咪已經開始幫你諗名喇，不過你daddy成日話唔駛咁早喎。其實英文名都諗好，但要等你daddy批准law，我諗你daddy要等你出左世至決定喇！

媽咪要睇電視喇，你要乖乖地呀！媽咪錫晒你！

Love,
媽咪

小寶性別之謎 by 胡師奶

尋日又去做產檢，
做超聲波時醫生話小寶進度正常，
佢話宜家開始唔可以齋度小寶身長，
而要睇多D野，for example，頭圍...

醫生show左小寶條脊椎骨&大腿骨俾我地睇，
仲有佢D手手腳腳，
本來小寶係握實拳頭，
搞到我地數唔到佢D手指，
但隔左一陣之後佢就攤開手板俾我地數，
非常合作 。

不過醫生話小寶做緊高難度動作，
扭埋一舊，
加上小寶仲細，
下次覆診先可以詳細D睇埋佢個樣&其他器官，
希望一切ok啦！

今次醫生仲解開左小寶性別之謎，
哈哈，
一如所料，係女仔呀！
其實我同大寶都覺得男仔女仔都冇所謂，
最緊要健康呀！

圖片一: 呢幅相好矇，但醫生話小寶係女仔喎，哈哈！


圖片二: 小寶的頭頂，大唔大呀？