第一次的N1 interview by 胡師奶

上個星期六帶左小寶去一間幼兒園interview，
其實冇諗過咁早有得in，
不過學daddy話齋當去見識下啦！

去到學校我負責填form，
daddy就負責同小寶warm up，
因為小寶得果一歲，
我都唔expect佢會識做D乜，
但求佢唔扭計發脾氣，
我已經好開心。

入到課室，
我地一齊對住兩個老師坐。
首先係個外籍老師俾D玩具俾小寶玩，
然後佢一邊睇小寶玩一邊問我地問題，
好彩小寶都好乖，
對住老師都好開心。

跟住輪到本地老師同我地interview，
佢就問得仔細一D同埋會試下小寶D反應。
當老師俾個假萍果同假麵包俾小寶時，
小寶雙眼發光兼以極速拎起想放入口咬，
老師見到都笑呀！

學校話2010年2月小寶可以插班讀下午班N1，
不過因為年齡問題當然9月要repeat啦！
其實我都考慮緊應唔應該俾小寶咁早入學，
不過學校話如果想延遲至2010年9月入學都可以，
咁就最好啦，
起碼小寶一定有書讀呀！

情人節@荔枝角公園 by 胡小寶

尋日我地約左表叔表嬸同康康表哥，
一齊去荔枝角公園玩呀！

因為我朝早返playgroup又去申請passport，
所以好疲倦呀，
不過我見到媽咪同表叔吹 bubbles都好開心，
但都唔夠康康表哥叻叻，
因為佢全程都好乖好興奮呀！

雖然天色唔係好好，
仲有幾滴雨，
不過個公園都幾大幾靚，
人又唔多，
交通又方便，
媽咪話值得一去呀！

我今日仲收到康康表哥送既情人節禮物，
嘻嘻，係一支花呀！
多謝康康表哥呀！

舅父叻叻！ by 胡小寶

前日係一年一度既渣打馬拉松，
舅父今年又參加全馬，
早一晚媽咪已經幫我send SMS俾舅父叫佢跑快D呀！

婆婆同盈EE當日都去左西隧入口同舅父打氣，
佢地仲去左維園睇舅父完成賽事添！

舅父今年以4小時40分鐘跑畢全程，
時間比上年快，
真係可喜可賀呀！

雖然媽咪成日講笑話如果我似舅父就大鑊，
但其實佢都幾想我似舅父架，
如果我都可以好似舅父咁有毅力就好喇！

<<婆婆與舅父>>


<<舅父與盈EE>>


<<舅父叻叻！>>

第一次BBQ by 胡小寶

尋日人日係同婆婆果邊D親戚團拜既日子，
媽咪話一如以往，
都係去白石BBQ。

媽咪之前兩年分別因為去旅行同坐月而缺席，
所以佢話好期待呀！
公公一向唔鍾意BBQ，
以往佢通常露一露面就走，
今年佢為左幫手湊我而撐足全場，
仲借架車俾我做換片區，
真係非常感激！
(嘻嘻，我都好合作，冇poo poo整臭公公架車呀！)

我今日以第二個新年造型亮相，
公公婆婆都未見過架！
佢地個個都讚不絕口，
表姨媽仲叫我鬼妹呀，哈哈！

雖然我冇份BBQ，
但舅母買左星星餅俾我食，
細表舅父又吹肥皂泡俾我睇，
所以我都好開心呀！

玩足一日，
daddy、媽咪同我都超累，
媽咪醒目地放假放埋今日，
可憐既daddy今朝要帶住疲累既身軀返工，
希望daddy今日唔好有太多會開啦！