胡小寶的家: 9月 2008

2008年9月28日星期日

眠眠中的嬰兒領洗 by 胡師奶

小寶終於成為天主教徒喇！！！

正如標題所講，
小寶係響眠眠中受洗，
因為佢響儀式中途已經去左搵周公，
到領洗時至俾D水淋醒，
好迷茫咁望住神父，
搞到神父都話"係我搞醒你呀？！"
哈哈！

之後小寶又繼續眠眠，
所以傅油、領十字架、點蠟蠋都係響主角眠眠中進行，
直到儀式完結小寶至醒呀！

響呢度要多謝Teresa，
好感激佢肯做小寶個代母呀！
仲有多謝Teresa個蝦子餅Louis，小寶個公公、婆婆同盈EE黎撐場，
好開心好感動呀！！！！！

雖然我同大寶daddy都唔係好虔誠既天主教徒，
但我地會努力做個好榜樣呀！

~小寶領洗的聖堂~

~儀式開始前精神奕奕~

~排隊領洗時睡著了~

~與公公婆婆合照~

~我地全家都係Catholic喇~

大日子 by 胡師奶

仲有五個鐘小寶就領洗喇，

好緊張呀！

尋晚去左rehearsal，

不過依然好混亂

希望今日順利啦~~

小寶宜家養精蓄銳

希望佢響church時精精神神又乖啦！

2008年9月26日星期五

三聚氰胺 by 胡師奶

最近好多父母俾"三聚氰胺"四隻字搞到好驚，
我都好擔心小寶隻奶粉會中招，
食物安全中心話安全，
但信唔信得過呢？

一直keep住十幾包雀巢米糊同奶米既sample，
仲有兩包係Heinz既，
但原來全部中國製造，
決定送去堆填區，
廢事煩呀！

一直都對中國製造既食物冇乜信心，
宜家簡直係驚驚驚驚驚！
唉，我偉大的祖國，
你搞D咁既野，
神州幾號都冇用啦！

2008年9月15日星期一

家好月圓慶中秋 by 胡師奶

尋日我地同小寶由朝玩到晚
過左一個好忙碌既中秋節呀！

一早我地就帶左小寶去參與彌撒，
小寶同上次一樣對聖堂充滿好奇，
不過彌撒中途佢已經眠眠，
可能歌詠團 D歌聲太悅耳喇！

彌撒結束後我地就出發，
目的地係東涌！
不過我地唔係去坐360，
而係去行商場咋！

去到商場已經十一點幾，
拿拿臨餵小寶食糊仔，
一如所料，
小寶不停周圍望，
幾經辛苦至完成任務。

小寶食完冇耐又去搵周公，
我同大寶daddy就拍下拖，
行到兩點小寶都未醒，
想同小寶影下相都唔得，
卒之只係臨走前影左張"小寶sleeping@東涌"...

我講笑同daddy講話小寶可能入閘就醒，
果然上到港鐵就見到小寶眼仔碌碌咁望住我地呀！
Daddy建議響欣澳站睇睇，
既然佢咁有興緻，
我就一於奉陪！

去到欣澳站發現係冇乜野睇，
所以我地就走去搭下迪士尼列車，
走去迪士尼站八八。

本來想去迪欣湖
但見到太陽伯伯就好驚
加上冇帶小寶支防曬，
最後決定打道回府喇！

小寶可能叉足電，
沿途都非常興奮，
不停咁應酬D乘客，
好似做左旅遊大使呀！

夜晚食完飯休息左一陣，
我地就帶小寶去平台玩燈籠，
好明顯小寶係唔知做乜，
不過佢見到其他小朋友D燈籠、螢光棒都好好奇，
我地話出年中秋再同小寶玩過！

2008年9月14日星期日

中秋節快樂！ by 胡師奶

話咁快又到中秋節，
期待已久既long weekend終於來臨！

尋日同上星期六一樣，
帶小寶去返Dr. Poon既playgroup。
小寶見到壽司仔Hugo好開心，
不過佢竟然扯人地D頭髮，
真係嚇死我呀！
我要好好教下小寶喇！

一如以往，
小寶只係上左大半堂就倦，
之後仲去左搵周公添，
睇黎佢都係鍾意眠眠多過玩呀！

返到屋企樓下同小寶影左幾張應節相，
真係好老土呀，哈哈哈哈哈哈哈~~~~~

夜晚同大寶daddy返church上嬰兒培育課程，
topic係婚姻，
我覺得內容幾好同埋冇上一堂咁悶呀！
返多兩個禮拜小寶就領洗喇，
好開心！
結婚前得我一個係Catholic，
兩年前大寶daddy領洗我已經開心到喊，
宜家小寶又即將領洗，
我覺得好圓滿呀！

今日會同小寶慶祝佢人生既第一個中秋節，
Yeah~~~