小寶走難日 by 胡師奶

早兩個星期收到屋苑通告話今日會暫停電力及食水供應，
所以一早已決定帶小寶去媽咪屋企"避難"。

今朝係我第一次自己一個揹小寶出街，
仲要響繁忙時間搭港鐵，
真係有D孤身作戰既感覺，
不過好彩有好心人讓座，
所以都好順利。

響中環交低小寶俾媽咪我就返工，
一邊工作一邊都擔心小寶乖唔乖，
好彩媽咪話一切ok，
咁我都安心D！

放工就上媽咪屋企接小寶，
又再一次逼港鐵返屋企。
本來想買個蛋糕慶祝小寶三個月生日，
但我實在太疲倦喇，
所以都急急腳返屋企。
好彩daddy買左禮物俾小寶，
總算有慶祝啦！

假期結束 by 胡師奶

產假話咁快就結束，
今日重返工作崗位，
真係唔係好習慣。

一開Lotus Notes發現有接近600個unread emails，
真係唔知由邊一個開始睇起，
睇到悶悶地我又上網睇小寶D相，
所以話雖然我個肉體響公司，
但個心係好掛住小寶。

放工以極速返屋企，
小寶一見到我就笑，
然後不停口咁講BB話，
好似想話我知佢今日做左D乜咁。

為左有多D時間陪小寶，
做野都要做快D呀，
希望日日都準時收工啦！

<<小寶: daddy媽咪返黎未呀？>>

換奶樽 by 胡師奶

小寶之前一直用NUK奶樽，
不過佢好似有好多肚風，
飲一餐奶要burp多次，
再加上雙酚A事件，
所以幫小寶換左B-free奶樽。
(雖然台灣個測試話NUK奶樽ok，
但始終都係避免用recycling label #7既膠容器喇...)

雖然B-free奶樽係貴D，
但婆婆同姐姐都異口同聲話新奶樽好D呀！
不過最煩係奶咀問題，
2號奶咀流得太快，
1號奶咀又出得太慢，
唉，原來飲奶真係一D都唔簡單！

肥豬 by 胡師奶

星期日同小寶行超級市場，
行經燒味部時，
有兩位太太經過我身邊，
跟住我聽到其中一位太太話：
"哎呀，我想返轉頭望下隻肥豬，好得意呀！"

因為果位太太講野都幾大聲，
加上我又八，
所以我擰轉頭望下兩位太太，
點知我見到兩位太太既視線係望住小寶架車而唔係燒味部...

Oh！原來太太所指既肥豬係小寶！

可能我唔笑個樣比較cool，
又可能果兩位太太覺得唔好意思，
所以佢地急急腳咁走左喇！

如果真係我個cool樣嚇親兩位太太，真係very sorry！

<<我係小肥豬>>

最後倒數 by 胡師奶

真係快活不知時日過，
我既產假話咁快就接近尾聲，
放多一個禮拜就完結喇！

可能我唔係事業型女性，
所以每次諗起要返工，
心情都有D低落，
好唔捨得我個心肝寶貝呀！

小寶小寶，
雖然媽咪要返工，
但我會成日掛住你架！

<<胡師奶與胡小寶>>

訓地 by 胡師奶

今日買左張膠墊放響客廳，
一來可以俾小寶好舒服咁響個廳度攤下，
二來希望我地抱少D等佢冇咁黐身。

返到屋企第一時間試用，
小寶訓響張墊度不停咁講野同笑，
玩玩下就去左搵周公，
似乎用家都幾滿意，
希望唔係三分鐘熱度啦！

<<呢塊地係我既！>>

<<好開心呀！我又多個地盤喇！>>

又打針 by 胡師奶

響一號風球下，
小寶要服食輪狀病毒口服疫苗同埋接受肺炎鏈球菌疫苗注射。

小寶去到診所時醒左，
所以我好擔心佢會郁來郁去，
不過個醫生好有心機咁用個鈴鈴去分散小寶D注意力，
餵小寶食口服疫苗時又慢慢餵，
仲算成功咁食晒D口服疫苗。

到左打針時小寶喊左幾聲，
不過好快就收晒，
宜家要密切留意佢有冇發燒，
希望冇事啦！

蓆 by 胡師奶

天氣開始熱，
為左小寶訓得舒服D，
早幾日同小寶個婆婆去上海街買嗎辰蓆俾小寶，
小寶個婆婆又爭住俾錢，
話要送俾小寶喎！

呢兩晚小寶都幾好訓，
唔知關唔關張蓆事呢？

今日行街見到有張細蓆，
平日可以放響小寶張龍椅，
出街又可以放響BB車，
所以雖然唔係嗎辰蓆，
但係我都買左，
唔知墊左之後小寶會唔會覺得舒服D呢？

去街街 by 胡師奶

今日同大寶daddy帶小寶去君薈坊行街街，
由於有shuttle bus，所以好方便。

今次係小寶第一次坐shuttle bus，
所以佢都好好奇，
全程周圍望，
不過去到君薈坊冇耐佢就眠眠喇，
可能佢坐車仔郁來郁去好舒服啦！

大寶daddy教我用扶手電梯時點樣控制小寶架私人坐駕，
可能佢架車仔比較重，
所以我覺得好"牙煙"，
我諗如果得我一個人我唔敢用喇！

我要做model by 胡小寶

今日盈EE又黎幫我影相喇，
媽咪仲幫我換套新衫仔添，
套衫仔靚唔靚呢？
媽咪話鍾意D顏色夠sharp，
條褲仔又得意喎，哈哈！



哈哈，我係daddy、媽咪同盈EE既御用model！

大寶與小寶 by 胡師奶

大寶daddy今個禮拜放假，
佢都趁呢個機會陪多D小寶，
而小寶都好鍾意黐住daddy架，
見到都覺得好溫馨呀！

一齊眠眠


daddy幫小寶掃風


一齊睇電視新聞報導

小寶似邊個？ by 胡師奶

哈哈，真係得啖笑！
不過我諗大寶daddy會開心D，
因為99.99%既親友都話小寶似我，
哈哈哈哈哈哈哈哈~~~

大project by 胡師奶

今朝我、大寶daddy、媽咪同Vicky姐姐完成左一個大project，
就係將我地張床移位，
一來可以令間房有多D空間，
二來令小寶張床唔駛對正冷氣機個風口位。

雖然只係搬一張床，
但事先要執清床下底D野，
又要收起小寶張床，
搬開張床之後又要清潔下個地板，
搞下搞下都好疲倦呀！

搬好之後發覺窗台可以放多D野，
算係意外收穫啦！
希望小寶快D戒夜奶，
如果唔係又要將佢搬入Vicky姐姐間房，
又係另一大project喇！

<<你地慢慢搬啦，我同周公social下先>>

Daddy的第一次 by 胡小寶

咁耐以黎，
daddy都未試過響我poo poo完幫我換片，
今朝佢終於獻出佢既第一次！

一如媽咪所料，
daddy係一片混亂，
所以到最後都係由媽咪一邊清理一邊講解，
而媽咪俾daddy既評級係...
MISSION FAILED！！

媽咪話，
daddy應該要向表叔多多學習，
而正所謂practise makes perfect，
呢個星期既換片任務就交由daddy負責，
哈哈哈哈哈哈~~~

<<我第一次著牛仔裙>>

努力中~~~ by 胡小寶

唔好以為我好留心聽媽咪講野，

其實我係集中精神，好努力咁poo poo緊，

(你睇下我真係緊握拳頭，出盡九牛二虎之力架！)

daddy、媽咪不停話好臭呀，

冇法啦，食能恩D poo poo係勁臭架，

大家忍耐下啦！

遊戲時間 by 胡師奶

唉，小寶個online photo album維修左成個禮拜，
搞到我冇得upload小寶D相，
激死我喇！

宜家我每日都會同小寶玩一陣，
其實都係求其創作D野同佢玩，
等佢聽多D我把聲同埋郁下D手手腳腳。

小寶家陣D要求真係好簡單，
俾佢摸下塊面已經好開心，
哈哈~~~

<<睇下媽咪塊面滑唔滑先>>

<<多做運動身體好>>

<<輪到daddy同我玩喇>>

<<你睇我笑到唔見牙又唔見眼>>

四月喇... by 胡師奶

話咁快就踏入四月，
即係話我既產假就黎完結，
每次諗起都有D唔開心呀！

自從出黎做野之後，
我都未試過放咁耐假，
雖然有時覺得照顧小寶仲辛苦過返工，
但每次見佢對住我笑，
又或者眼仔碌碌咁望住我，
有時又"咦咦哦哦"好似想傾偈咁，
就乜野辛苦、煩惱都唔記得晒喇！

我諗我要一段時間至適應到返工既生活，
同埋我諗到時我一定會牽腸掛肚，
掛死我個小天使喇！

<<胡大口與胡小寶>>

<<心情靚靚>>

五合一疫苗 by 胡師奶

今日係愚人節，
亦都係小寶打五合一既大日子！

今朝出街時又大風又落雨又潮濕，
好彩只係響樓下間診所打，
比較方便。

同上次打針一樣，
我望都唔敢望，
小寶亦只係喊左幾聲就繼續眠眠，
醫生俾左D退燒藥以防萬一，
希望用唔著啦！

過兩個禮拜又要打針，
下次係打肺炎鏈球菌第一針再加輪狀病毒口服疫苗，
到時又要擔心喇！

<<打針的証據>>


<<打針真係好痛呀！>>