產假 - 第一天 by 胡師奶

今日正式放產假喇，
但尋晚發夢竟然夢見公司D人，
好驚呀！

本來今朝想分好小寶D衫再慢慢洗，
但因為有太多唔同size，
又有D厚，有D薄，
所以我分分下決定洗晒D size比較細既衫先算。

小寶個舅父話我可以繼續落order叫佢響美國買野，
反正佢有大把野要寄返香港喎！
既然你咁有誠意，
我會再花少少時間睇下，
哈哈哈哈！

忙碌的週末 by 胡師奶

呢兩日好忙呀，
尋日同媽咪&小妹去左買衫仔俾小寶，
主要都係買6個月之後著既，
D衫仔幾靚又好抵買，
滿載而歸！

買完衫去左媽咪屋企休息一下，
又出發去做產檢。
上次抽左D分泌去驗B型鏈球菌，
result係冇野，
咁又安心D。

醫生今次estimate小寶7磅3安士重，
聽左之後真係嚇左一跳，
不過醫生話當3kg咁上下喎！

今日我地就大執屋，
大寶晨早就同舅父、表弟一齊返去西貢搬我張舊床返黎，
而我就響屋企清除垃圾，
希望騰D空位出黎放野。

好彩，一切都算順利，
宜家書房變左做工人房加雜物房，
不過我放假會再清理下，
希望可以整齊D啦！

小妹個朋友今日又送左D衫仔、玩具、尿片同埋D產後用品俾我，
真係好多謝呢位素未謀面既朋友，
我放假會慢慢執好D野，
哈哈！

嘻嘻 ^o^ by 胡小寶

又係我胡小寶呀，
呢幾日我繼續搞到媽咪冇覺好訓，
行唔安、坐唔樂，
周身唔自在。
嘻嘻，
其實我都係俾個藉口俾媽咪嗲下daddy，
用心良苦呀！

媽咪話舅父舅母農曆新年會去美國玩兼探三伯公一家，
所以我出世時佢地未必響香港喎！
唔緊要啦，
舅父舅母買多D手信俾我就得喇！
宜家媽咪好努力咁prepare張shopping list，
又問下Queenie堂舅母美國有乜好介紹喎，
所以呢幾日媽咪好忙呀！

最後一個月 by 胡小寶

大家好，我係胡小寶呀！
我住響媽咪個肚裡面已經9個月喇，
我未知幾時會出黎呀，
不過都快喇！

我個騰雞媽咪好驚我會失驚無神恭喜佢呀，
佢話最好我預早通知佢，
等佢有所準備，
不過我諗我幫唔到佢喇，哈哈！

媽咪呢排變左做超級大懶蟲呀，
因為佢俾我搞到周身痛，
晚晚都訓得麻麻地！
其實我都唔想架，
不過我宜家大大舊，
(醫生尋日estimate我有6磅4安士呀！)
郁少少都會搞到媽咪喇。

媽咪，你努力D捱埋呢個月啦，
就黎衝刺到終點喇！

35週 by 胡師奶

小寶已經響我個肚度住左245日喇，
其實陀小寶都算陀得輕鬆，
一直都冇乜唔舒服，
近排雖然比以前辛苦，
但暫時都頂得順。

呢兩晚大寶daddy都有叫小寶乖乖地，
俾我訓個好覺，
果然呢兩晚pp都去少左，哈哈！

有時我覺得小寶好似認得大寶daddy把聲咁，
因為好多時大寶daddy同佢講野，
或者同佢講完野之後，
佢都會郁得好勁，
希望佢出世後會認得大寶daddy把聲啦！

痛痛痛痛痛 by 胡師奶

呢幾日條尾龍骨好痛，
有時恥骨都痛，
個肚又好"聚"好實，
訓落床同起身都好"論盡"呀，
但又成日要去pp喎，
真係覺得好辛苦呀！

唉，
呢D小小痛楚已經覺得辛苦，
真係懷疑自己頂唔頂得住生BB既十級痛楚呀，
開始擔心我呢個大喊十會拆左間醫院喇...