雙滿月 by 胡師奶

尋晚我地幫小寶擺雙滿月宴，
正式帶小寶同各位親戚見面。

為左幫小寶以最靚、最女仔既一面見人，
早幾個禮拜已經諗定點幫佢打扮，
揀好左裙仔之後，
就好努力咁搵頭帶同絲襪仔，
好彩皇天不負有心人，
終於俾我買到，哈哈！

晚宴一切都好順利，
(除左小寶突然poo poo之外)
好感激各位親戚到賀，
小寶又收左好多利是同禮物，
真係多謝晒！

希望小寶快高長大，
身體健康，
日日都開開心心！

<<我兩個月大喇！>>

<<難得的全家幅>>

<<我靚唔靚呀？>>

沉默的媽媽 by 胡小寶

呢個禮拜媽咪好靜，冇乜逗我玩，
皆因佢病到七彩呀！

佢上個禮拜六見有少少喉嚨痛，
已經拿拿臨去睇醫生，
點知食左D藥都冇乜用，
夜晚仲發燒添。

到左星期日朝早，
Daddy幫媽咪量體溫，
嘩！40.6度呀！
可能因為發高燒，
媽咪話佢隻右耳同喉嚨勁痛，
仲有咳添。

媽咪又去睇醫生，
為求快D好返，
佢決定停餵母乳，
希望D藥勁D會好D喎！

好彩媽咪當日下晝已經退左燒，
不過直到今日，
媽咪隻耳仔同喉嚨依然好痛，
仲有少少傷風同咳，
佢話希望快D好番，
唔駛戴住個mask好似幪面超人咁對住我喎！

<<眼定定望住幪面媽咪>>


<<媽咪，我俾D小寶能量俾你，等你快D好番！>>

小寶踢被實錄 by 胡師奶

唔知係咪個個BB都鍾意踢被，
不過好明顯小寶係，
基本上佢有被必踢，
簡直係佢既嗜好兼強項呀！

小寶呀小寶，
你係女仔黎架，
有D儀態好唔好？
而且媽咪真係擔心你對腳會變成甲組腳呀！

第一次戴帽仔 by 胡師奶

個look好奇怪，
但係我鍾意！

打針 by 胡師奶

今日下晝帶小寶去健康院打Hep B第二針，
我見個個BB打完針出黎都喊得好淒涼，
都好擔心佢會喊到七彩。

輪到小寶時，
佢響度訓緊覺，
姑娘幫佢打針時我望都唔敢望，
真係好肉痛呀！

好彩小寶只係喊左兩聲，
之後就繼續眠眠，
非常合作^o^

除左打針，
今日仲有磅重同度頭圍。
小寶今日重4.37kg，頭圍37cm，
姑娘話進度良好，
放心晒！

<<我最鍾意一邊沖涼一邊食手指>>